baritorayapost.com, Kalimantan Tengah – Kesah tanuhui/dongeng makai bahasa dayak ma’anyan. Hanteru inanaun umpu naan upu samatan ekat et ajiken nelang panganuan bangaran hi Atak Maipa (red). Basa daya mandanan la anuan ru sanggup iah nguta obat 3 kali erang andrau nguta rakanan pusuk dengkut pasungan/Pusuk Suko, inyusupan asan daya mamalar ngutik hang muka lewu wawei anuan nien.
Uma ma kalawah la kindrik-kendrek, indrik ului nien, akhir sudahni nian jua hi Atak Maipa nien wawei walu baanak 3 ani Atak Lanan. Upu kisuh nelang maruhau hengauni sagulung-sagalang entu lemang hawa rahai lepuh gagayap. Haaa….barakat sa panalu sameh wangun bujur sukup ganap jari kanyau budas kalakuan ru. Saawe kaule ngatur surah.
Bai awuk iru ulun rahat rami ngenah. Teka sa mintan mambanyur hampe manabing manyalamau matan uras ngapi eleh na sandrengei ru mandrahni. Pada uma here panadaup gayuh ulun. Bu masisaan bahadu ngulah wuwu tangkala matan muat hi itak daya surah ru paling tida dami muat turai na lantik ma pakan Buntok pakulis ru?.
Sadang ma keuni ni rereu hi Atak Lanan amuan lepuh suwuk tangkala ni. Kunu ni la muat amput wuwu daup yiti die. Tiwas unte kaelan.
“Ewuh hanye hampe punte uras mampang kawan wuwu tangkala here tanan ranu. Ari kunu ni, jauh…kala eau wurung maka taping tapah amun sa kaina. Bu baasa hanye mindah tangkalani. Sadang luput ahie, bu amulei antu ruhau Atak Lanan kaini ranap budas punsi erang katunun mihak hg iring ume. Bai kasisirni nuwe ma wuang wuwu daupni tulakan mudi. Nyampat sa sika iwara ma daupni amun wuwu daupni haut wuat. Takut daupni sampat muat bu kasasat ulahanni nien”.
Dami ma keuni ni bu tulak ah here rueh panadaup lepuh muat pakarang masing-masing. Sa isa ma rahai, sa isa ni lagi ma hawa butit.
Ewuh hampe punte masisaan salenga gagunu eau gauh Atak Maipa. Awaaattt pukah daup..! Hi Atak Lanan nempat nanan punte ngarasa inun kabana sa andrau pukah…?? Dami ngini dikar-daker budas daupni iah bajagaan mukah wuwu hg amau watang. Eha daup ekatni tantiak Atak Maipa.
Karengei sa kahie, pada set nyintak taruh hi Atak Lanan kaini pilujuh iah rudal siap timak wuwu daupni nadap hanye. Ari..ariiii musibah kunu ni amun sa aret kene. Sadang magin riet ahie sadang papahni wuwu daupni nyudu ma putut pampulu.
Ewuh here rueh daupni nyuwuk ma wuang wuwu matan erang kapala keluarga sawayan weruk angkeng daya kabalatenan ngurep punsi.
Pada ekat muhut urung hi Atak Lanan karengei surah daupni iwawara rajaki hampe iwey. Ekat hanye sa ngene wuwu kaayuh weruk.
“Ari nanaun umpu la sarita. Takam na uras tau la ikakisuh nai. Kude ada budas hampe sa limpauwen. Duan amun hampe nyanara ulun,” ekat tau jari hal kala eau Sunsu sadi sa mintan wuyaka kaupan kingking. (Tim/Red/BRP).
Tanuhui (Cerita) Dayak Ma’anyan.
Penulis/Penyunting Naskah
oleh : Sekber Aseng (Pemerhati Lingkungan, (Pemerhai KATARI (Kiak Tangis Tane Ranu), Safety Officer in Mining Coal, Owner media online baritorayapost.com, Owner & CEO PT. Versa Mura Media tinggal di Muara Teweh, Barito Utara, anak Ineh Dikin).
