baritorayapost.com, BARITO TIMUR – Tulak ma sakolah hi Atak Siung huyu inehni dami mudi die tarie hang warung midi kopi, teh andri vanili. Itung kamalem die jadwal sambayang uneng here, baran pakai hengau nalusur tumpi eau inehni sambil narui duit andri satetan (catatan) bana la na widi nien. Itung hi Atak Siung na tabuat maadi, amun puang kakune na eau bu tau lalus mahi kapanyari huyuan ru. Duan mun tapu hanye panalu dahulu andri kan hengauni.
Ha inun neh dieni, gawai rami basepak bal palus puang Atak Siung karasa lelek kan satetan (catatan) inehni nien. Bu hanam hindra sapanyang lalan ngunuan inun sa kabana la na widi…??. Akhirni itungni jua….kopi teh andri vanili.
Bu tarie eh hanye hang warung, eauni aku huyu inehku midi kopi cap gandranglawa, teh cap goal para andri vanili cap kekek. Bakaliling budas…pas mahi isa naan ulun ngari sa kopi andri vanili. Ekat teh sa naan. Pada bai sa udi ni bu laporan ma inehni pauweng ulun ngari sa kopi andri vanili, ekat teh.
Ha ada aur eau inehni maka sa lanani pasuah lawang hg warung bana iru, kaawe sa tuntinu…??. Ha eauku, aku huyu ineh midi kopi cap gandranglawa andri vanili cap kekek. Mahi eau ulun…maka iyuh paksa eau Atak Siung.
Ekat galis ringi inehni, hiyalat anak eauni mudai sa mahi mun antuhnu kairu. Eau ulun kopi cap laba2 andri vanili cap lowo eau inehni. Ha mahadin aku ngeau kairu sa unengku midini ulun Maanyan, amun antuhku makai bahasa Indonesia magin hie sa puang ni kataru eau Atak Siung. Kunu inehni sika sa bujur, ware suni. Biar na kunyak sika puang sagar iyuh uut mun sa kopi gandranglawa.
Temeh sah…dami sa urusan debat nawan kan anak ti, adakan tulat sa mahi suah nguta andri nebu bangku sakolah, nyadang kan ahlini gin talau. Duan mun niba urusan duit, ewww…iah pakar akuntansi panai here ngatur keuangan ru nempan pas saldo akhirni.(Cerita Dayak Maanyan/BRP)
